ئالماس

تەرجىمە قىلغۇچى: نەسلىخان ئۇيغۇر

پادىشاھ بىر كۈنى ۋەزىرلىرىنى يېنىغا توپلاپتۇ. ئۇلاردىن بىرىگە بىر ئالماسنى ئۇزىتىپ:

– بۇنى چېقىۋەتكىن. – دەپتۇ.

– قانداقسىگە چاققۇدەكمەن، بۇ ناھايىتى قىممەتلىك بىر ئالماس. – دەپتۇ ۋەزىر.

پادىشا ئالماسنى باشقا بىر ۋەزىرگە ئۇزىتىپ تۇرۇپ:

– بۇنى چاققىن، – دەپتۇ.

ئىككىنچى ۋەزىر:

– بۇ ئالماس دۆلەتنىڭ يېرىمىدەك قىممەتكە ئىگە تۇرسا، ئۇنى قانداقمۇ چاقاي.– دەپتۇ.

پادىشاھ سارايدىكى پۈتۈن ۋەزىرلەردىن ئوخشاش ئىشنى تەلەپ قىلىپتۇ. لېكىن ھېچكىمنىڭ ئالماسنى چاققۇسى كەلمەپتۇ. پادىشاھ ئەڭ ئاخىرىدا ئايازغا ئالماسنى ئۇزىتىپ:

– ئەي ئاياز، دەپ باققىن، بۇ ئالماسنىڭ قىممىتى قانچىلىك؟ – دەپ سوراپتۇ.

– بۇ ئالماس بەك چىرايلىق ھەم پارقىراقكەن. ناھايىتى قىممەتلىك بولۇشى مۇمكىن.

شۇنىڭ بىلەن پادىشا:

– ئۇنداقتا ئۇنى چېقىۋەتكىن. – دەپتۇ.

ئاياز بىر تاش پارچىسى بىلەن ئالماسنى چېقىۋېتىپتۇ. ئالماس پارچە پارچە بولۇپ كېتىپتۇ. بۇنى كۆرگەن ۋەزىرلەر ۋارقىرىشىپ كېتىپتۇ:

– بۇنداق قىممەتلىك بىر ئالماسنى قانداقمۇ چېقىۋېتىشكە پېتىندىڭ!

ئاياز:

– مەن ئۈچۈن پادىشاھنىڭ بۇيرۇقى ئالماستىن بەكرەك قىممەتلىكتۇر. – دەپ جاۋاپ بېرىپتۇ.

شۇنىڭ بىلەن پادىشاھ ۋەزىرلىرىگە:

– بۇ پەقەتلا ساختا بىر ئالماس ئىدى. سىلەرنى سىناپ باققانىدىم. – دەپتۇ ۋە ھەقىقى ئالماسنى ئايازغا بېرىۋېتىپتۇ.